Интервју: Проф др. Софијанка ГламоЧанин, претседател на организацискиот одбор на Кампањата “Пријатели на Клиниката за детски болести”
Граѓаните сакаат да донираат, но треба да ги потсетиме
Катерина Богоева
Македонската јавност од ноември, минатата година, има отворена можност да се вклучи во исклучително значајната акција посветена на децата, нивното здравје и иднина. Кампањата “Пријатели на Клиниката за детски болести” успеа да го привлече вниманието на граѓаните од земјава, но и на преставниците на странските држави, на граѓанските здруженија, на бизнис-секторот, уметниците, естрадните ѕвезди, медиумите... Потребните финансиски средства и донации за обнова на објектот на Клиниката, но и за купување на исклучително скапите инструменти, за потребните лекови за детското здравје, со задоволително темпо пристигнуваат на отворената жиро-сметка, иако како што вели проф. д-р Софијанка Гламочанин, голем дел од ветеното треба да се реализира во месеците што следуваат.
Проф. д-р Софијанка Гламочанин, освен редовните професионални обврски на Одделот за хематоонкологија при Клиниката за детски болести, заедно со своите колеги од Организацискиот одбор за кампањата, но и со заинтересираните граѓани за помош, веќе пет месеци се обидува Клиниката да го добие местото што го заслужува во општеството, но и во очите на децата- пациенти.
Г.С. За успешно координирање на активностите на Кампањата “Пријатели на Детската клиника” потребно е да ги усогласите професионалните и волонтерските обврски. Колку волонтеризмот е присутен на Клиниката? С.Г. Од 1993 година кога ја реализиравме првата продажна изложба на детски цртежи од деца-пациенти на Одделот за онкологија, во Клубот на пратениците во Скопје, волонтеризмот континуирано е присутен. Пред десет години волонтеризмот во болнички услови во земјава не постоеше, иако во западните земји тој претставуваше нормална појава. Нормално е граѓаните, доколку сакаат, се разбира со дозвола од надлежна институција, волонтерски да учествуваат во одделни сегменти од функционирањето на болницата. Се обидовме тогаш за првпат на Клиниката за детски болести, да воведеме волонтерски активности, а спомената изложба ја организиравме со Здружението на жените за борба против малигни заболувања “Животна искра”. Тие, од тој период, со своите активности се трудат да им помагаат на различен начин, на жените со таков вид заболувања. По изложбата следуваа приредби за децата, волонтерите доаѓаа и ги занимаваа децата во Клиниката со различни активности. Меѓу нив беа и жени волонтерки од Јапонија кои им правеа оригами, играчки, но и волонтери од средните училишта и студенти кои им раскажуваа приказни, им читаа книги, учеа со нив. Дел од волонтерите стекнатите искуства ги вградуваа и во своето стручно знаење. Една од членките на “Животна искра” наслика мурали со претстави од детски приказни кои го разубавуваат просторот. Морам да истакнам дека пејачката Виолета Томовска, оттогаш до денес, континуирано, на разчлични начини волонтрески помага, а тука се и музичарот Тони Китановски, кој држи концерти, а со себе носи и гости од различни земји, но и Верица Ристевска, Угро и други. Бројот на волонтери, на луѓе што сакаат да помагаат до денес е зголемен. Како пример може да го наведам неодамна формираното Здружение на родителите на децата со малигни болести “Пеперутка”, чии членови помагаат и учествуваат во Кампањата. Фондот на средства кои тие го собираат ќе се искористи за купување на потребните лекови за децата. Покровител на кампањата е потпретседателката на Републичкото собрание Лилјана Поповска.
Г.С. Го ветуваше ли стартот на Кампањата потребниот оптимизам? С.Г. Многумина ни велеа дека нема да ни успее со кампања да ги собираме потребните средства. Јас сум задоволна од досегашниот тек, со оглед на познатите услови во стопанството, но реализацијата бара голема упорност и организираност. Во Кампањата досега се вклучија сите оддели каде има хронични болни. На Клиничкиот центар отсекогаш му недостасувале потребните средства за постигнување на неопходниот стандард за пациентите и персоналот. Државата помага, но тоа не е доволно. Пред неколку години беше направена реконструкцијата само на едната страна од Клиниката, недостасуваа средства за другата, самиот објект има големи проблеми со фасадата, со нагризување на темелите, со водоводната и канализациската мрежа, парното не функционира како што треба. Амортизирани се дел од машините кои се неопходни за непречена работа: машините за перење, апаратот за стерилизација на шишињата. Болничката апаратура делумно е застарена и потребно е да се обнови ако сакаме да го задржиме нивото кое го имавме во минатото. Кризата на бегалците од Косово ги исцрпи залихите што ги поседувавме, а истите не беа обновени, со исклучок наедна сосема мала донација. Имаме проблеми и со набавка на потребните лекови, од кои еден дел се добива со задоцнување, но сепак се снаоѓаме и се обидуваме да го држиме чекорот. Ова беше причина Стручниот колегиум да ја организира кампањата “Пријатели на Детската клиника”, класифицирајќи ги проблемите во три групи на приоритети. Уште на стартот н$ поддржа Клиничкиот центар кој е и еден организаторите, имаме поддршка од Министерството за здравство, а на почетокот ни се приклучија и УНИЦЕФ. МРТВ помогна во изработка на документарниот филмски материјал за состојбата со Клиниката.
Г.С. Кој се се јавува, донира, дава финансиски средства или пак работи на нивно обезбедување? Кои се формите познати и непознати досега кај нас во обезбедување на потребната помош? С.Г.Последната активност беше на 8 март, организирана од здруженијата “Животна искра”, Здружението на самохраните мајки, Црвениот крст, Општината Центар, кога на децата им беа обезбедени подароци во вредност од 10 илјади денари. Во текот на февруари студиото “Чарли фешн”, организира модна ревија со непрофесионални манекенки, жени од јавниот живот, интелектуалки, членки на здруженија на граѓани, а со собраните средства од ревијата и од изработените модели, планираме да купиме дигитален фотоапарат со софтвер, за изработка на потребната фотодокументација. Во текот на април, планираме да ги презентираме досегашните резултати, но Кампањата ќе продолжи да трае. Се респектираат сите донации, како што се цртежите од детските ликовни студија од Битола и од Скопје со кои е исполнета дел од внатрешноста на болницата, и зафатот на фирмата Макмонт која направи две купатила. Наскоро очекуваме да се постави најавената опрема на Кабинетот за нутриција со директна донација од “Техногас”, а и да биде опремена и соба за физикална терапија од страна на “Гланс Смит Клајн”. Донации најавија и фирмите Зегин, Алкалоид и други. Донациите можат да бидат и се во апаратура, опрема на простор, финансиски средства. С$ уште не сме ги добиле најголемите најавени донации кои треба да се реализираат во текот на оваа година. Најголем дел од зафатите за реновирање на Клиниката треба да бидат овозможени со донации од страна на Италијанската и Швајцарската амбасада во Македонија. Тие аплицираат за средства на повисоки инстанци и покажуваат навистина добра волја и надеж за обебзедување на финансиите. Австриската, Француската и Германската амбасада, исто така најавија обезбедување донација за потребната апаратура, а со средствата од реализираниот концерт на Тоше Проески планираме купување апарат за невролошки мускулни болести.
Г.С. Докторите, во случајов, самите секојдневно учат што значи реализација на кампања. Се обидовте ли можеби да ангажирате стручни лица? С.Г. Се обидовме, но каде и да се обратевме, понудите беа многу високи и се откажавме. Агенциите кои работат на кампањи бараат многу пари и сега работиме сами, се обидуваме да вклучиме што повеќе луѓе, да работиме транспарентно, луѓето да знаат каде се трошат донираните средства. Реализацијата на Кампањата оди побавно, бидејќи ја води Организацискиот одбор и Стручниот колегиум, многу доктори се вклучени во најразлични активности, од пишувања писма, покани, проекти, контакт со бизнис-секторот. Членови на Организацискиот одбор се докторите В. Милев, С. Пеова, А. Костовски, Н. Поп-Јорданова, А. Софјанова, К. Ставриќ, Зоран Гучев, како и потпаролката, новинарката Теута Крашница-Чучкова. Кога би имале менаџерски тим, обезбедувањето на потребните средства и лекови за децата би одело многу полесно. Но, сепак, ние сме упорни и стекнуваме нови искуства.
На пример, со помош на отворена телефонска линија успеавме да ја добиеме потребната донација за трансплантација на коскена срцевина на едно болно дете. Сметам дека ѓраѓаните на Македонија сакаат да донираат, да помагаат, но треба да ги потсетиме.
|