|
СО ПОДДРШКА НА МРФП
15 земјоделски прирачници
На 19 јуни Македонската развојна фондација за претпријатија (МРФП) промовира 15 прирачници наменети за земјоделски здруженија и за нивните членови, но и за пошироката јавност. Целта на издавањето на овие прирачници е со едноставни совети за индивидуалните земјоделци да им се помогне во раното откривање на болестите на земјоделските култури, во начините за квалитетно производство, во семејното книговодство и другите проблеми со кои се соочуваат земјоделците во текот на нивната работа.
Прирачниците се испечатени со финансиска поддршка на МРФП, а темите се нарачани од самите земјоделски здруженија. Како автори на 15-те прирачници се јавуваат експерти во одредената област, а некои од прирачниците се дело на повеќе автори.
Петнаесетте прирачници ги носат следниве наслови:
„Производство на овчо сирење во домашни услови и негово чување”, „Производство на гроздови ракии кај индивидуални производители на грозје”, „Производство на обоени вина во мали винарски визби”, „Болести и штетници кај градинарските култури”, „Здравствена заштита на пчелите”, „Пчелни производи”, „Одгледување печурки”, „Силажа и сенажа”, „Најважни заболувања во интензивното свињарско производство”, „Водење сметководство на индивидуални земјоделски стопанства”, „Здруженија - Вашата економска и политичка моќ„, „Исхрана на овци и кози”, „Здравје и нега на овците”, „Пласман и продажба” и „Матично книговодство и селекција кај овците”.
Прирачниците ќе се дистрибуираат преку земјоделските здруженија кои се јавуваа како предлагачи на темите: Здружение на одгледувачите на овци „Повардарие” Неготино; Здружение на лозарите „Витис” Неготино; Здружение на производителите на еко храна „Еко-плод” Богданци; Пчеларско здружение „Нектар” Битола; Пчеларско здружение „Пчела” Велес; Здружение на печуркарите „Фунги” с. Карбинци; Сојуз на одгледувачите на говеда „Македонско млеко” Свети Николе; Здружение на одгледувачите на свињи Битола-Прилеп; Здружение на одгледувачите на овци и кози „Пелистер” Битола.
Петнаесетте прирачници се отпечатени во тираж од по 500 примероци.
| 
