Форум
Дали студентските и средношколските организации работат ефективно?
Овој пат, прашањето на Форумот на „Граѓански свет“ е поврзано со работата на студентските и средношколските организации. Ве прашуваме за мислење - дали овие здруженија работат ефективно? Ова особено се однесува на нивната активност поврзана со актуелните проблеми од областа на образованието во нашата држава.
Во минатиот број на „Граѓански свет“ објавивме текст во рубриката „Тема“ во кој потсетивме на улогата на средношколските и студентските организации во создавањето на македонската државност и градењето на македонскиот идентитет.
Дали денешните организации го следат принципот на авангардност и лидерство во денешни услови?
Вашите мислења на оваа интересна тема можете да ги доставите на веб-страниците: www.graganskisvet.org.mk или www.civicworld.org.mk.
Ана Ѓорчева, студент:
Не сум многу активна во Сојузот на студентите, но мислам дека оние кои се определиле да се ангажираат поактивно во оваа организација, недоволно јасно и гласно ја изразуваат волјата на студентите. Прашање е дали тие воопшто ја знаат волјата на студентите, бидејќи Сојузот не го чувствувам присутен меѓу нас студентите, никогаш не спровеле некоја анкета, ниту пак на друг начин се обиделе да го дознаат нашето мислење по одредени прашања. Не знам како е во организацијата на средношколците, но мислам дека е слично, следејќи што се случува во последно време во оваа област. Зошто е тоа така - е, тоа е друго прашање, на кое не треба да се даваат паушални оценки, туку добро да се испита состојбата. Можеби некој ќе се сети да го направи тоа.
|