ПРОГЛАСЕНИ ГОДИНЕШНИТЕ ЛАУРЕАТИ НА МЦМС
Поддршка на позитивните примери околу нас
Трет пат по ред, активностите на граѓанските здруженија, поединците, институциите, претпријатијата и другите субјекти во нашето општество, ги добиваат Наградата за граѓанско општество и демократија или Наградата за одржлив развој “Херт Јан ван Апелдорн”, за своите постигнувања во претходната година. Со нив се сака да се поттикне нивната храброст и ангажираност, но и да се истакнат позитивните примери и нешта кои се случуваат околу нас
Г. Боге Чадиновски, “Алкалоид” од Скопје, А1 Телевизија, Македонското женско лоби, еколошкото друштво “Роса” од Чашка и здружението на граѓани “Натира” од Отља, Липково – секој на свој начин ги заслужија Наградата за граѓанско општество и демократија или Наградата за одржлив развој “Херт Јан ван Апелдорн”, што веќе традиционално ги доделува Македонскиот центар за меѓународна соработка, за постигнувања во претходната година и за долгогодишен придонес. Свеченото доделување на наградите, кое се одржа во скопскиот хотел “Холидеј Ин”, привлече многу гости и новинари, кои од година во година покажуваат с$ поголем интерес за оваа, кај нас единствена награда од овој вид.
Како што на свеченоста рече г. Сашо Клековски, извршен директор на МЦМС, овие награди се признание на храброста и посветеноста на многу граѓани и организации во изградбата и поддршката на демократските вредности, на граѓанското општество и на одржливиот развој. Наградите се доделуваат од фондот што го основа МЦМС откако и самиот во 1998 година доби мошне престижно признание – Наградата за демократија и граѓанско општество, од Европската Унија и САД.
Трет пат по ред, активностите на граѓанските здруженија, поединците, институциите, претпријатијата и разните други субјекти во нашето општество, ги добиваат овие награди, за своите постигнувања во претходната година. Со нив се сака да се поттикне нивната храброст и ангажираност, но и да се истакнат позитивните примери и нешта кои се случуваат околу нас.
М.И.
НАГРАДА ЗА ОДРЖЛИВ РАЗВОЈ “ХЕРТ ЈАН ВАН АПЕЛДОРН” ЗА ДОЛГОГОДИШЕН ПРИДОНЕС – БОГЕ ЧАДИНОВСКИ
Поддршка на правата на лицата со хендикеп
Г. Боге Чадиновски е добитник на Наградата за промоција и поддршка на правото за одржлив развој, за промоција и поддршка на правото на лицата со хендикеп да учествуваат, да придонесуваат и да уживаат во континуиран економски, социјален, културен и политички развој, во кој во потполност ќе ги остварат своите човекови права и фундаментални слободи. Г. Боге Чадиновски придонесува во создавањето на законска рамка потребна за остварување на правата на лицата со хендикеп; во подготовка на национални стратегии; како и во политиката за деинституционализација на лицата со хендикеп за постигнување на нивна целосна интеграција во општеството. Г. Боге Чадиновски придонесува во вклученоста и во соработката со граѓанските организации.
Г. Боге Чадиносвки дава придонес и во други подрачја, особено во координацијата на хуманитарниот одговор на кризите во 1999 и во 2001 година.
Профил
Г. Боге Чадиновски е роден во 1943 година, во с. Буринец, струшко. Завршува дефектологија во Универзитетот во Загреб, во 1978 година. Од 1968 до 1980 година работи како дефектолог во Заводот за заштита и рехабилитација на деца и младинци-Скопје. Од 1981 год. работи во Министерството за здравство и социјална политика, сегашното Министерство за труд и социјална политика, каде работи на прашањата од социјална заштита, особено за унапредување и за развој на лицата со посебни потреби. Придонесува во законите за детска заштита; за социјална заштита; за вработување на инвалидни лица; за цивилните инвалиди од војната; во Националната стратегија за изедначување на правата на лицата со хендикеп во Република Македонија и друго. Ја води Националната хуманитарна координација во 2001 година.
НАГРАДА ЗА ГРАЃАНСКО ОПШТЕСТВО И ДЕМОКРАТИЈА ЗА ЈАВНОСТ И ИНФОРМИРАЊЕ И/ИЛИ СОРАБОТКА – ЗГ “НАТИРА”
Зацврстување на соработката во граѓанскиот сектор
Македонскиот центар за меѓународна соработка на Здружението на граѓани “Натира” од с. Отља, Липково, му ја доделува Наградата за граѓанско општество и демократија за јавност и информирање и/или соработка. “Натира” е добитник на наградата за јавност и информирање и/или соработка за градење врски, мрежи, размени, комуникација меѓу организациите во граѓанскиот сектор и со државниот и со приватниот сектор. “Натира” придонесе за зголемување и зацврстување на соработката во граѓанскиот сектор (Регионалниот НВО Ресурсен центар Куманово) со општините Куманово и Липково и со локалните заедници во Липково.
Профил
Здружението на граѓани “Натира” с. Отља, Липково е основано во 1997 година. Цел на “Натира” е научно-истражувачка, апликативна и образовно-едукативна мисија од доменот на економијата и социологијата на заштита на човековата средина. Дејствува на Липковско-кумановската регија. Досегашни постигнувања: изградба на водовод во с. Отља и активности за враќање на довербата.
НАГРАДА ЗА ОДРЖЛИВ РАЗВОЈ “ХЕРТ ЈАНВАН АПЕЛДОРН” ЗА ПОСТИГНУВАЊА ВО ПРЕТХОДНАТА ГОДИНА – АД “АЛКАЛОИД”
Производство во хармонија со природата
АД Алкалоид е добитник на Наградата за одржлив развој, за промоција и за поддршка на одржливиот развој, во кој експлоатацијата на ресурсите, насоките на инвестициите, ориентацијата на технолошкиот развој и институционалната промена, се во хармонија и овозможуваат сегашните и идните потенцијали да ги задоволат човековите потреби и аспирации.
Алколоид, реализирајќи ги во практика стратегијата и политиката за животна средина, како и Акциониот план за заштита на животната средина, е прва компанија која започна со спроведување на стандардите за управување на животната средина во Македонија и претставува пример за позитивен пристап во решавањето на аспектите на животната средина.
Профил
Алколоид во 2002 година:
- Го доби сертификатот за Систем на управување на животната средина (ЕМС) според ИСО 14001 за ПЦ Фармација (за ПЦ Билкарство во 2000 година);
- Со официјалното завршување и ставање во функција на двете нови фармацевтски фабрики, реализирани се значајни инвестициони зафати од споменатиот план: современи системи за климатизација и отпрашување, централи за откривање и за дојава на опасни гасови, системи за производство на висококвалитетна технолошка вода, комплетна опрема која обезбедува ефикасна противпожарна заштита;
- Го започна Проектот за фазно напуштање на ЦФЦ 11/12 во производството на аеросоли, што е дел од Националната програма за заштита на озонската обвивка.
Во 2002 година поголем број алкалоидови вработени учествуваа на низа семинари и работилници од областа на управувањето и заштитата на животната средина. Алколид АД остварува и соработка со Министерството за животна средина и просторно планирање.
НАГРАДА ЗА ГРАЃАНСКО ОПШТЕСТВО И ДЕМОКРАТИЈА ЗА ПОСТИГНУВАЊА ВО ПРЕТХОДНАТА ГОДИНА – МАКЕДОНСКО ЖЕНСКО ЛОБИ
За надминување на половите разлики
Македонскиот центар за меѓународна соработка на Македонското женско лоби (МЖЛ) му ја додели Наградата за граѓанско општество и демократија за постигнување во претходната година.
Македонското женско лоби е добитник на наградата за промоција и заштита на човековите права, за промоција и заштита на правата на жените. МЖЛ придонесе во промена на законската регулатива за избор на пратеници (членот 7 во Законот за избор на пратеници), со која се обезбедува задолжителна родова квота од 30%. Тоа придонесе за зголемување на учеството на жените во политиката и во јавниот живот преку зголемување на бројот на жените во Собранието од 6,6% во 1998 година на 18,3% (22 од 120) во 2002 година. Вредноста на МЖЛ е уште поголема со тоа што жените, преку заедничкото работење, успеаја да ги надминат своите политички, верски и етнички разлики, обединувајќи се околу прашањата од заеднички интерес.
Профил
Македонското женско лоби е основана на 1 март 2000 година, како неформална група на жени од различни структури (НВО-и, политички партии, владини структури, медиуми, синдикат, независни интелектуалки), со различна етничка, верска и политичка определба. Цел на МЖЛ е поголемо учество на жените во политиката и во јавниот живот, особено на местата на одлучување и родова рамноправност во сите сегменти на општествениот живот. Досегашни постигнувања се: кампања за повеќе избрани жени на локалните избори 2000 (50% повеќе избрани советнички и првите три градоначалнички); донаторски конференции за проекти од женските НВО-и во 2000 и во 2001 (со поддршка од Институтот отворено општество - Македонија и УНДП); кампања за повеќе избрани жени на парламентарните избори 2002; формирање Клуб на парламентарки во март 2003 и други активности.
НАГРАДА ЗА ГРАЃАНСКО ОПШТЕСТВО И ДЕМОКРАТИЈА ЗА ДОЛГОГОДИШЕН ПРИДОНЕС – А1 ТЕЛЕВИЗИЈА
Промоција на независни и одговорни медиуми
Македонскиот центар за меѓународна соработка на А1 Телевизија & ја додели Наградата за граѓанско општество и демократија за долгогодишен придонес.
ТВ А1 е добитник на наградата за поддршка на демократијата и на доброто владеење за промоција на независни и одговорни медиуми и за слобода на печатот. А1 е првата независна телевизија која во 1993 година го започна процесот на плурализација во медиумите. А1 придонесе за јакнење на одговорноста на јавниот, на приватниот и на граѓанскиот сектор.
А1, особено со информативната програма, придонесе и во промоцијата и во заштитата на човековите права, во поддршка на ненасилно разрешување на конфликтите, особено на конфликтот во Македонија во 2001 година, во воспоставување на фер и демократски изборни процеси.
Во 2000 година, Информативната програма на А1 ја доби наградата за објективно информирање од Здружението на новинарите на Македонија.
Профил
А1 започна со емитување на програма на 22 јануари 1993 година.
Цели на А1 се: брзо и навремено информирање, вистинска информација и професионалност. Тие се темелат врз: храброст - информативниот пристап темелен врз непристрасноста, независноста, објективноста, вистинитоста, самостојноста во работењето; креативност - можност за авторско изразување (проекти и начини на изразување што се за првпат применети во земјата); гледачите - оние за кои постои овој медиум и чие мислење е основа за неговата работа.
НАГРАДА ЗА ГРАЃАНСКО ОПШТЕСТВО И ДЕМОКРАТИЈА ЗА ЈАВНОСТ И ИНФОРМИРАЊЕ И/ИЛИ СОРАБОТКА – ЕД “РОСА”
Развој на локалната заедница
Македонскиот центар за меѓународна соработка на Еколошкото друштво “Роса”, ос село Чашка, му ја додели Наградата за граѓанско општество и демократија за јавност и информирање и/или соработка
“Роса” е добитник на наградата за јавност и информирање и/или соработка за градење врски, мрежи, размени, комуникација меѓу организациите во граѓанскиот сектор и со државниот и со приватниот сектор. Роса го реализира Акциониот план на заедницата со основање на граѓански комитет составен од граѓани на општина Чашка, членови на НВО - секторот, локалната самоуправа и приватниот сектор.
Профил
Еколошкото друштво “Роса” од Чашка е формирано на 25.06.1997 г., а регистрирано е на 20.01.1999 год. Целта на Роса е едукација за подобра животна средина и создавање на услови за добро живеење. Досегашни постигнувања се: “СТОП” за меѓунационалните тензии; “Чиста средина”; “Солза”; “Алеја”; “Да чекориме напред”а и други програми.
Луѓе и организации кои оставаат трага
Добитници на Наградата за одржлив развој Херт Јан ван Апелдорн во 2001 година, за постигнувања во претходната година, им беше доделена на Холдинг компанија “Комуна” АД Скопје и на здружението на граѓани “Полио Плус” од Скопје.
Добитници на Наградата за одржлив развој Херт Јан ван Апелдорн во 2000 година беа г. Јосиф Таневски, за долгогодишен придонес и г-ѓа Кристина Диконсон, за постигнувања во претходната година.
Добитници на Наградата за граѓанско општество и демократија во 2001 година беа Фондацијата Институт отворено општество Македонија, за долгогодишен придонес и ХДЗР Месечина Гостивар, за постигнување во предходната година. Наградата за јавност и информирање и/или соработка му е доделена на Град Скопје.
Добитници на Наградата за граѓанско општество и демократија во 2000 година беше Првата детска амбасада во светот Меѓаши, Скопје, за долгогодишен придонес.
|