ПО УСПЕХОТ НА РАКОМЕТАРКИТЕ НА "КОМЕТАЛ - ЃОРЧЕ ПЕТРОВ" 

Спортскиот дух на граѓанско општество

Одамна не се случило градскиот плоштад во Скопје да биде преполн со луѓе кои тука не се собрале заради некој политички митинг, штрајк, протест или сличен (мачен) повод, туку – од чиста радост. На 19 мај, градскиот плоштад бликаше од радоста која ни ја приредија ракометарките на "Кометал - Ѓорче Петров", кои го станаа клупски европски шампиони во ракомет.

Иако не е вообичаено во "Граѓански свет" да објавуваме информации под рубрика "спорт", овој пат се ослучивме за тоа, бидејќи, како што можеби знаете (или не), и спортските друштва кај нас се категоризирани како здруженија на граѓани.

Значи, успехот на девојките од "Кометал - Ѓорче Петров" е на некој начин и успех на граѓанскиот сектор во Македонија. Но, најважно е тоа што тие, преку овој спортски успех, ги поврзаа граѓаните на Македонија во заедничкото радување. И, се потврди дека спортот и спортскиот дух ги негува и пренесува вредностите за кои се залагаат и невладините организации – вредности кон кои се стреми идејата на граѓанското општество: соработката, тимската работа, бришење нетрпеливоста меѓу етносите, постигнувањето успеси и резултати со сопствен труд...


М. И