ПРВА ДЕТСКА АМБАСАДА ВО СВЕТОТ "МЕЃАШИ"

 Центар за деца и млади

Во рамките на кампањата за елиминација на најлошите форми на детски труд, "Меѓаши" наскоро ќе отвори центар за деца и млади во населбата Јане Сандански, Скопје

Кај нас сe уште преовладува мислењето дека експлоатацијата на децата и нивниот труд се случува само во земјите во Африка, Азија или Јужна Америка. Но, за жал, тоа е појава присутна и во нашите села и градови, на улиците и пазарите, насекаде околу нас - вели г-ѓа Гордана Пирковска - Змијанац, генерален секретар на Првата детска амбасада во светот „Меѓаши”, која пред една година ја започна кампањата против експлоатацијата за елиминирање на најло­шите форми на детски труд, во соработка со Global March Against Child Labour.

Токму поради ваквото гледање, вели г-ѓа Пирковска - Змијанац, првата цел на кампањата беше да им се предочи овој проблем на граѓаните, па беа изработени различни пропагандни материјали на македонски, албански и ромски јазик и беше лобирано кај државните институции. Исто така, се лобираше за потпишување на Конвенцијата и на препораките за забрана на детскиот труд и елиминирање на најлошите видови на детски труд, на Меѓународната организација на трудот, кои веќе ги потпишаа 50 држави. Во Амбасадата „Меѓаши” сметаат дека со потпишувањето на овие документи би се создале законски рамки за побрзо елиминирање на оваа појава.