Конференција на ПДАС Меѓаши и Здружението на даночните работници 

Финансиска одржливост на граѓанскиот сектор
 
Конференцијата имаше за цел да поддржи силно учество на граѓанскиот сектор во развојот на демократските процеси и во остварувањето на тековните и стратешките интереси на граѓаните на Македонија за забрзување на процесот на прифаќање на општоприфатените меѓународни стандарди и мерила во финансирањето на граѓанските организации

Во организација на Првата детска амбасада во светот - Меѓаши и Здружението на даночните работници (ЗДР) на 27 јануари годинава, во Скопје, се одржа конференција со наслов “Финансиската одржливост на граѓанскиот сектор – филантропија и оданочување”.

Конференцијата имаше за цел да поддржи силно учество на граѓанскиот сектор во развојот на демократските процеси и во остварувањето на тековните и стратешките интереси на граѓаните на Македонија за забрзување на процесот на прифаќање на општоприфатените меѓународни стандарди и мерила во финансирањето на граѓанските организации, јасни, едноставни критериуми и конзистентни правила и транспарентни процеси на аплицирање за добивање финансии.

На конференцијата беа усвоени и прокламирани неколку препораки за подобрување на финансиската одржливост на граѓанските организации во Македонија: Подобрување на даночната рамка за граѓанските организации во делот на сопственото финансирање и во делот на дарувањето во земјата и донациите од странство (ослободување до одреден износ на  добивката остварена од вршење стопански активности; целосно ослободување на пасивните доходи - закуп, камата, дивиденда); неоданочување на дарувањата кај оние кои даруваат, кај физичките и кај правните лица; изедначување во даночниот третман кога расположливоста на донацијата е во ствари и кога е во пари); Донесување нова регулатива за јавното финансирање на граѓанските организации, со која ќе се воспостават правила, критериуми и постапки, кои ќе се применуваат и за финансирањето на граѓанските организации од единиците на локалната самоуправа; Сите јавни приходи  собрани од игрите на среќа да бидат наменети за финансирање на проекти реализирани од граѓанските организации; Продолжување на подготвителните активности за воведување на т.н. унгарски данок 1% во даночната структура на Република Македонија; Збогатување на структурата на финансирањето на граѓанските организации со издвојување на средствата собрани од плаќањето одредени концесиите за користењето на општонародни добра, на тој начин што мал дел, односно  процент од овие средства би се намениле за финансирање проекти реализирани на национално и на локално ниво; Ослободување од персоналниот данок за исплатите како  надоместоци на трошоците (патните билети, сместување, исхрана и др.) за надворешните лица и волонтерите, ангажирани од  граѓанските организации; Ослободување од ДДВ на образовните и хуманитарните активности на граѓанските организации, како и остварување право на одбивка на претходниот данок за оние активности за кои тоа право е дадено на странските донации за кои Владата на РМ има склучено договор.

Конференцијата беше поддржана од Европскиот центар за непрофитно право ИЦНЛ (ИЦНЛ) од Будимпешта, Амбасадата на Република Унгарија во Македонија, Министерството за финансии на РМ, Центарот за институционален развој и Фондацијата Институт отворено општество Македонија.

Одржувањето на Конференцијата е одбележани на веб-страницата на ИЦНЛ: www.icnl.org.

Д.М.