ОРГАНИЗАЦИЈА НА ЖЕНИТЕ "ГАЗИ БАБА"

Прифатилиште "Надеж" за жртвите на насилство

Организацијата на организациите на жените на Македонија не учествуваше во светската кампања против семеј­ното насилство. Претседателката на оваа организација, г-ѓа Мирјана Димовска, како и претседателката на ОЖ - Гази Баба, Драгица Ристовска, со кои разговаравме, сметаат дека кусотрајни кампањи од овој тип немаат голем ефект и дека е многу поважно да се спрове­дува континуирана кампања за решавање на овој проблем. Односно, дека не е доволно за проблемот само да се зборува, туку да се прават конкретни чекори за негово „аморти­зирање”. Во таа насока е прифатилиштето „Надеж” и телефонот „Доверба” (173-424 и поштенски фах 157) на ООЖМ кои функци­онираат од минатото лето, основани од Организацијата на жените на Гази Баба.

Г-ѓа Драгица Ристовска вели дека во интерес на жртвите, адресата на прифатилиштето ја знаат само тие и полицијата и институциите со кои соработуваат.

Во прифатилиштето жените и децата кои се жртви на насилство не само што се згри­жуваат, туку тие се поврзуваат и со лекар, психолог, соработник од организацијата на Црвениот крст, со центрите за социјална работа.

- За формирањето на овој центар се подготву­вавме пет години, а активно работевме три години за неговото отворање. Тој е всушност имплементација на странските искуства што ги добивме на меѓународни семинари од кои имаме и сертификати, вели г-ѓа Ристовска, која е носител на сертификат на американско-руска организација која работи на проблемот на семејното насилство.

ООЖМ има планови за отворање прифати­лишта за жртви на семејното насилство низ цела Македонија, а идејата е прифатот да е организиран до целосно згрижување на жртвата. Во следната фаза на работењето на центарот „Надеж” се планира наместо 24 часа, колку што трае сега периодот на згрижување, жените во него да престојуваат еден масец, а децата три месеци, за време на кои ќе се работи на решавање на проблемот на секој случај поединечно.

---

Изготвени "женски" веб-страници

Во рамките на Програмата за јакнење на капацитетите на женските невла­дини органи­зации, поддржана од PHARE LIEN програмата, изготвени се веб-страниците на жен­ските здруженија кои се партнери на МЦМС во оваа програма. Времено, односно додека не се регис­трираат сопствените веб-страници на органи­зациите, тие ќе можат да се најдат на веб-страницата на МЦМС:
www.mcms.org.mk/programa.htm