ПРЕТСТАВУВАЊЕ

ЕРГОС
САКАМ ДА РАБОТАМ

Името на ЕРГОС доаѓа од старогрчкиот јазик и значи “Сакам да работам”. Тоа е здружение кое работи за унапредување на професионалната ориентација и вработување на лица со хендикеп. Мисијата на ЕРГОС е одговор на прашањето кое се крие зад неговиот назив: помош за оспособување и вработување не само на хендикепираните лица, туку и на други лица кои се нашле во тешка социјална положба: раселени лица, лица по издржана затворска казна, самохрани мајки и други.

Во рамките на оваа своја мисија, Здружението работи на спроведување на активности за развивање на здравствените и едукативните способности на хендикепираните деца и младинци, нивна професионална ориентација и оспособување за работа, помош при нивното вработување во заштитни претпријатија, преку развивање сопствен бизнис на нивните родители или на нив самите, како и вработување кај други работодавци. Покрај ова, ЕРГОС дава помош при вработување на сите оние кои по некоја причина се нашле во тешка положба и немаат егзистенција.
ЕРГОС има издадено Прирачник за работа за родителите со деца кои имаат пречки во развојот (финансиран од МЦМС); изработи елаборат за формирање Центар за лицата со телесен хендикеп; има оспособено лица со хендикеп за изработка на сувенири во домашни услови (проект финансиран од Европската унија и ИНТЕР СОС), оспособување на хендикепираните лица за резбање (финансирано од ЦРС), унапредување на советодавната помош за вработување на лицата со хендикеп (финансирано од ФАРЕ), како и други проекти и активности.
ЕРГОС соработува со повеќе други организации кои работат за унапредување на положбата и на правата на лицата со хендикеп. Здружението има свои активи во Скопје, во Битола, во Прилеп, во Штип, во Тетово, во Охрид, во Ресен, во Велес и во Струмица. Адресата на централниот борд во Скопје е: “Јани Лукровски” 14/19, а телефонот е 02/171-423.
М.И.