ДВИЖЕЊЕ НА ЕКОЛОГИСТИТЕ НА МАКЕДОНИЈА

Заштита на Пелистер, земјоделие без хемикалии

Двата проекта - истражување на биодиверзитетот и кампања за заштита на Националниот парк Пелистер и спроведување на одржливо земјоделие, се финанаирани од Владата на Швајцарија. Се работи и проект за едукација на младите

Движењето на екологистите на Македонија - ДЕМ пред три месеци започна да работи на проект кој ќе има две компоненти: заштита на Националниот парк Пелистер и одржливо земјоделие во Македонија. Проектот се одвива во соработка со познатата организација „Пронатура” од Швајцарија, а го финансира Швајцарската влада, а предвидено е да трае три години.

Компонентата што се однесува на Пелистер содржи истражување на биодиверзитетот на националниот парк (ќе се спроведува во соработка со Друштвото за проучување и заштита на птиците на Македонија) и кампања за заштита на Пелистер (во соработка со здруженијата „Молика” од Битола и „Бигла” од Демир Хисар). Во рамките на оваа кампања ќе биде опфатено и прашањето на одржливиот туризам, односно туризам што нема да ја нарушува природата. Втората компонента, одржливото земјоделие, има за цел намалување на употребата на пестициди и вештачки ѓубрива и добивање здрав и чист земјоделски производ. Граѓаните ќе имаат можност овие производи да ги купуваат во специјализирани продавници. Овој вид производство ќе се спроведува на пет локалитети, во соработка со локалните здруженија на граѓани: „Одек” - Кавадарци, „Вила Зора” - Велес, „Изгрев” - Свети Николе, „Озон” - Струмица и „Кладенец” - Пехчево.

Покрај овој проект, како што вели претседателката на ДЕМ, Пандора Никушева, во тек е уште еден, наменет на младите - наречен „Еколошка едукација во акција”. Овој проект се одвива во соработка со бугарското здружение „Зелени Балкани”, а во него ќе учествуваат 20 деца од Македонија - 10 од Домот за деца без родители „11 Октомври” и 10 од Еколошкиот клуб на гимназијата „Јосип Броз-Тито” од Скопје. Едукацијата ќе се одвива на практичен начин, преку екскурзии во природа, акции за чистење и уредување на просторот и размена на искуства, при што ќе се организираат два десетдневни работни кампа, во Бугарија и во Македонија, во Преспа.