ПРОГРАМА НА ЕВРОПСКАТА КОМИСИЈА ЗА ПОДДРШКА НА ЗДРУЖЕНИЈА НА ГРАЃАНИ

Проекти за демократизација, граѓанско општество и човекови права

До 16 февруари годинава, здруженијата на граѓани од Македонија ќе можат да поднесат пријави за поддршка на проекти кои имаат за цел развој на демократијата, граѓанското општество и заштита на човековите права, што ќе бидат финансирани од Делегацијата на Европската комисија во Скопје

Техничкиот дел на оваа програма го води МЦМС, во име на Делегацијата на Европската комисија. Апликациите за проектите и сите дополнителни информации во врска со процедурата можат да се добијат во МЦМС, секој работен ден од 10 до 14 часот. Поддршката на проектите ќе биде од 3.000 до 50.000 евра, што претставува 90 проценти од вкупните проектни трошоци. Проектите треба да имаат јасно дефинирани цели, целни групи и планирани резултати и да бидат релевантни на клучните теми и проблеми на демократски развој.

Тие теми се: антидискриминација (вклучувај­ќи ги етничките малцинства и антирасизмот); правата на децата и младите; граѓанско образование; решавање на конфликти; права на потрошувачите; изборни процеси; промо­ција на човекови права (вклучувајќи ги правните реформи); информативни центри (вклучувајќи правни совети); локална администрација (вклучувајќи граѓанско учество во локалната демократија); медиуми (вклучувајќи слобода на печатот и обука на медиумите); реформи во казнениот систем (вклучувајќи ги правата на затворениците); развој на професионални здруженија; правата на бегалците и мигрантите; промоција на владеење на правото и антикорупциски мерки; реформи и развој на синдикатите; женски права (вклучувајќи родова еднаквост). Посебно се добредојдени проекти што се однесуваат на изборните процеси, мерките против корупцијата и владеењето на правото и правата на Ромите.