Менса Македонија

Нови тестирања и семинари

20.02.2003

Невладината организација на луѓето со високо наптросечна интелегенција, Менса Македонија, повторно е актуелна со нови активности. По шестмесечна пауза, повторно ќе се одржат тестирања, и тоа во Прилеп, Битола, Скопје и Велес.

Овој викенд ќе има две тестирања. Најпрвин во Прилеп, во сабота на 22.02.2003 година со почеток во 12 часот, во просториите на Градската библиотека Борка Талески. В недела 23.03.2003 година е закажано тестирање во Битола, со почеток во 13 часот, во Големата сала на општината.

Ова ќе биде второ тестирање во Прилеп, по што се очекува формирање на локален Менса клуб во овој град, додека во Битола ова ќе биде четврто тестирање, а таму веќе е развиен локалниот клуб и се подготвуваат семинари и предавања на теми блиски до интелигенцијата, што ќе се одржат пролетва.

Тестирањето во Скопје ќе биде во Големата сала на градското собрание (до Зоолошката градина), в сабота 01.03.2003 година, со почеток во 13 часот. Во Велес пак, тестирањето е закажано за 15.03.2003 година, но се уште се чека одобрението за користење на сала од некоја локална институција.

За учество на овие тестирања заинтересираните треба да понесат хемиско пенкало и плик со адреса на која сакаат да ги добијат резултатите, кои никој нема да ги знае освен нив. Тестовите претставуваат прогресивни матрици или логички низи од слики, при што решението се одбира од неколкуте понуди. Со нив се тестира перцепцијата, логиката и брзината во донесувањето на одлуките, во определен временски интервал. Овие тестови се универзални во сите земји од неанглиско говорно подрачје и не содржат текстуални прашања. Тестовите се лиценцирани од Менса Интернационал, за што при учество во тестирањето се наплаќаат 300 денари.

На овие тестови нема „положени и неположени“. Секој што ќе го решава тестот добива сертификат за неговиот коефициент на интелегенција, според баждарењето на овие тестови. Оние кои ќе добијат резултат, односно коефициент на интелегенција од 148 или повеќе, спаѓаат во 2% од светската популација што имаат право да се зачленат во Менса како организација што ги обединува.

Инаку, минатата есен започнаа семинарите за едукација на наставници од основните училишта со предавања за едуцирање на овој кадар, како да се препознаат надарените деца и работата со нив. Наставници од осум основни училишта веќе беа присутни на два од предвидените четири (двоневни) семинари одржани во Собрание на Скопје, а пролетва тие предавања ќе завршат. Наесен се планира нов циклус на семинари и работилници, но сето тоа зависи од финансиската конструкција што треба да ја обезбедат донатори, бидејќи Менса Македонија освен симболичната членарина нема други извори на финансирање. Доколку бидат обезбедени средства, овие предавања ќе се одржат и во градови вон Скопје.

Членови на Менса Македонија поединечно учествуваа на разни семинари за едукација од природните науки во Научно истражувачката станица Петница во Србија, а за ова лето се предвидува учество на конференција во Русе, Бугарија, на тема „Креативност во математичката едукација и едукација на надарени студенти“. Предвидени се предавања и објавување на текстови од добиените сознанија, со цел информирање на пошироката јавност за работата на ова поле.

Менса Македонија постои веќе три години како невладина организација, но се уште има статус на „национална организација во основање“ во меѓународното семејство. Досега преку 300 луѓе на тестот добиле резултат - коефициент на интелегенција преку 148, а повеќе од 200 се зачлениле во невладината организација во Македонија.

Во име на Менса Македонија,
#015, Александар Табаковски