[shqip]

МЦМС по четврти пат ги додели наградите за граѓанско општество и демократија и за одржлив развој “Херт Јан ван Апелдорн”

Наградените извор на инспирација за сите

На 8 јуни 2004 година МЦМС по четврти пат ги додели Наградата за граѓанско општество и демократија и Наградата за одржлив развој “Херт Јан ван Апелдорн”. Плакетите и чековите на наградение им беа врачени на пригодната свеченост организирана во хотелот Холидеј ин во Скопје.

„Четири години по ред има доволно храбри луѓе кои се извонреден пример и инспирација за сите нас“, рече Сашо Кле­ковски, извршен дирек­тор на МЦМС, обраќајќи им се на присутните на све­ченоста. „Секој на своето ниво, без разлика дали тоа е во својата гру­па, дали е локално или на­цио­нално, направил нешто со што може да се гордее. Тие можат да бидат пример за сите нас“, додаде Клековски.

Признание за актерите на граѓанскиот сектор

На­градата за гра­ѓанско оп­­­штество и де­мократија ја добија: Аце Коцевски, за долгогодишен придонес; Европското движење на Ре­пу­блика Ма­ке­донија, за придонес во прет­ходната година и Организацијата на же­ните “Радика” за јавност и информирање/или соработка.

“Оваа награда колку што ми припаѓа мене, толку им припаѓа и на моите соработници  и на сите активни актери во многуте иницијативи”, изјави Аце Коцевски, актуелен градоначалник на Велес и добитник на Наградата. “Заедно со невладините организации успеавме да го актуелизираме проблемот со загадувањето во Велес. Во иднина ни останува да продолжиме со ангажманот околу лечењето на младите дечиња”, додаде Коцевски.

Од името на Европското движење на Република Македонија се заблагодари Лидија Неделковска. “Последните години нашата работа е свртена кон ширењето на европскиот дух во Македонија, да станеме што побргу дел од големото европско семејство”, потенцира таа.

Во името на Организацијата на жените “Радика” наградата ја прими Азиза Асаноска, претседателка на организацијата. “И жените Македонки со исламска религија се фактор во македонското општество. ОЖ “Радика” во своето постоење и дејствување перманентно гради мостови на соработка во граѓанскиот сектор, без разлика на етничката и политичката припадност”, рече Асановска.

Во чест на Херт Јан ван Апелдорн

Наградата ја одржлив развој “Херт Јан ван Апелдорн” оваа година ја добија Виолета Томовска и Михаил Токарев за долгогодишен придонес и Специјалната олимпијада на Македонија за придонес во претходната година. Наградата за граѓанско општество и демократија МЦМС ја воспостави инспирирана од Наградата за граѓанско општество и демократија што му беше доделена од страна на САД и ЕУ во 1998 година. Наградата за одржлив развој “Херт Јан ван Апелдорн” е воспоставена во чест на големиот поддржувач на МЦМС, Херт Јан ван Апелдорн,  по кого и  е именувана оваа награда. Во ова име се крие ликот и делото на човекот со непресушен ентузијазам, Холанѓанец кој со првиот тим на МЦМС го сподели знаењето и искуството спечалено на многубројните мисии во белиот свет и придонесе МЦМС да стане ова што е денес.

 “Се сеќавам на ликот на Херт Јан кога престојуваше во Македонија”, рече Виолета Томовска, добитник на Наградата. “Првиот голем проект за борба против малигните заболувања ние, од “Животна искра”, го спроведовме благодарение на МЦМС. Сите овие години се обидуваме да ги информираме и болните и здравите жени затоа што не би сакале здравите жени да го поминат тоа што го поминавме ние. Се надевам дека можеме да сметаме на вашата подадена рака”, рече таа, обраќајќи им се на присутните.

“Оваа Награда претставува признание за сите оние кои работеа заедно со мене во последните години за развојот на граѓанската свест и за заштитата на животната средина и културното наследство”, рече Михаил Токарев. “Таа е доказ дека кога нешто се работи со љубов, тоа вродува со резултати”. На присутните им се обрати и Огнен Стаматовски, во името на Специјалната олимпијада на Македонија. “Само што се вративме од Луксембург каде што станавме европски прваци во фудбал. Светската организација ни овозможи спортска интеграција, градење современо општество во кое лицата со посебни потреби можат да бидат горди што се дел од него”, додаде тој, заблагодарувајќи се за признанието.

Работата на развојот на демократијата и граѓанското општество, како и прифаќањето и уште повеќе имплементирањето на концептот на одржлив развој, не е завршена, таа тукушто започна. Сепак, важно е да се каже дека тие процеси во Македонија се започнати и дека граѓанскиот сектор и неговите претставници се дел од тој процес. Соочувањето со сите проблеми и тешкотии во текот на тој процес се нормални и затоа е потребно да си оддадеме и признанија кои МЦМС ги преточи во Награда за граѓанско општество и демократија и Награда за одржлив развој “Херт Јан ван Апелдорн”.


Награда за граѓанско општество и демократија за долгогодишен придонес

Аце Коцевски во својата долгогодишна активност како пратеник, јавен службеник и градоначалник, дава посебен придонес во вклучувањето на граѓаните во одлучувањето. Заедно со “Друштвото на родителите за грижа за здраво поколение”, “Здружението на родителите на децата заболени од церебрална парализа” и “Порака” учествуваат во разрешување на најголемиот еколошки проблем во Велес (и Македонија). Преземаат иницијативи до највисоките владини институции и на меѓународно ниво, како и конкретни активности за подобрување на квалитетот на животната средина во Велес.


Награда за граѓанско општество и демократија за придонес во претходната година

Европското движење во Република Македонија (ЕДРМ) во 2003 даде посебен придонес во афирмацијата на европската идеја и евроинтеграциите преку активностите:  „Европа - нашата иднина” и Европска недела во средните училишта - „Знаејќи повеќе за Европа и Европската Унија, знаеме повеќе за нас”. Во јуни 2003 година ЕДРМ беше иницијатор и организатор на меѓународен настан на претседателите на европските движења на земјите од Југоисточна Европа за соработката во процесот на евроинтегрирањето на која беше усвоена заедничка резолуција во пресрет на Самитот на ЕУ што се одржа во Солун. 


Награда за одржлив развој “Херт Јан ван Апелдорн” за постигнувања во претходната година

“Специјална олимпијада” - Македонија во текот на 2003 година “Специјална олимпијада” иницира кампања за вклучување на лицата со ментален хендикеп во секојдневните текови на живеење преку нивно активирање на разни спортски активности. Досега активно се вклучени повеќе од 600 лица.


Награда за граѓанско општество за соработка

ОЖ “Радика” придонесе за градење мрежи, размени, комуникација со месните заедници (12 ограноци) и општина Ростуше и Македонското женско лоби. ОЖ “Радика” работи во исклучително пасивно подрачје (реканскиот крај).


Награда за одржлив развој “Херт Јан ван Апелдорн” за долгогодишен придонес

Виолета Томовска како претседател на “Животна искра” и во соработка со низа други граѓански организации, како и поради личното искуство, активно е вклучена во поддршката на жените заболени од рак на дојката, насочени во борбата за превенција и намалување на заболувањата.

Д-р арх. Михаил Токарев од 1989 година па наваму, Михаил Токарев се залага за спроведување на одржливиот развој во РМ, како во областа на заштитата и унапредувањето на животната средина, така и во заштитата и ревитализацијата на градителското, културно-историското и природното наследство. Тој е главен иницијатор и прв претседател на ДЕМ, кога во рок од една година Движењето беше омасовено (од 10+3 на 20+6 членки) и кога беа организирани меѓународни активности за заштита на Дојранското и на Охридското Езеро, а по неколку години и на Преспанското Езеро.