Во организација на Мировна акција, Прилеп и Мултикултура, Тетово

Тренинг за ненасилна разработка на конфликти

Во организација на Мировна акција од Прилеп и Мултикултура од Тетово, во соработка со Акција против насилство и изградба на мир, Гњилане, Косово, и Центарот за ненасилна акција од Сараево, БиХ, од 24 до 30 април во Охрид, ќе се одржи тренинг за ненасилна разработка на конфликти за млади активисти и поединци од Р. Македонија.

Повикот на организаторот за учество на семинарот се однесува за сите заинтересирани млади поединци и активисти на граѓански организации за работа на полето на изградба на мирот, ненасилството и ненасилното разрешување конфликти.

Тренингот има за цел кај учесниците да развие вештини, способности и знаења неопходни за подобро разбирање и препознавање на насилството во општеството и принципите на ненасилство, да ги зајакне за активно вклучување во општествените случувања, за идната работа на полето на изградба на мирот.
Темите коишто ќе се обработуваат на семинарот се тимска работа, перцепција, предрасуди, дискриминација, насилство, ненасилство, идентитет и национален идентитет, судир и др. Тие ќе се обработуваат на работилници коишто ќе се состојат од искуствени вежби, размена на мислења, пленумски дискусии, работа во мали групи, како и поединечни презентации.

Групата ќе брои 20 учесници од Република Македонија, а краен рок за пристигнување на пополнетите прашалници е 31 март 2004 г.
За резултатите, сите што аплицирале, ќе бидат известени на 6 или на 7 април 2004 г.

Патните трошоци, сместувањето и исхраната се на товар на организаторот на семинарот.

Прашалникот можете да го најдете на е-маил: тренинг_охЖмт.нет.мк, или на факсовите 048/401-888; 046/335-448.

Обучувачи ќе бидат Агрон Бафтијари од Мултикултура, Тетово, Горан Талески од Мировна Акција, Прилеп, Газменд Мурсели од Акција против насилство и изградба на мир, Гњилане, Косово, и Тамара Шмидлинг од Центарот за ненасилна акција од Сараево, БиХ.

За дополнителни информации можете да се обратите кај Горан Талески на 070/308-251 или Агрон Бафтијари на 070/630-180.

Накратко за организаторите

Мултикултура, Тетово

Мултикултура е невладина и непрофитна организација чија цел е да им помогне на младите луѓе од различни етнички групи да соработуваат и да немаат национални предрасуди.

Работат на афирмација на меѓуетничката соработка и толеранција во Р. Македонија, промоција на човековите права, напредок во меѓуетничките односи, промоција на демократијата и цивилното општество, како и давање помош преку консултации и технички средства на помалку искусните организации.

Можете да н’е посетите на www.multikultura.org.mk.

Мировна акција, Прилеп

Мировна акција е невладина и непрофитна организација, основана во 2002 година. Од самите свои почетоци работи на промоција на мирот со посебен акцент на приговорот на совеста.

Досегашните активности им биле насочени кон признавање на правото на приговор на совеста, а потоа кон промоција на истото преку одржување информативна линија и советувалиште за приговарачи на совеста, одржување јавни собири, дистрибуција на пропагандни материјали и сл. Во последно време работат на подобрување на статусот на приговарачите на совест во установите каде што работатат, како и на создавање информативни пунктови за ПС низ Р. Македонија.

Акција против насилство и за изградба на мир – АНП, Гњилане, Косово

АНП-Гњилане е невладина, непрофитна, мултиетничка организација која е регистрирана во Гњилане во 2002 година.

Целите на АНП се: изградба на мирот, развиток на демократските процеси и граѓанското општество, заштита на човековите права, работа на освестување на граѓаните за прифаќање и уважување на различностите.

Целите ги реализираат преку организирање тренинзи за меѓуетничка толеранција, трибини за човековите права, како и културно-спортски активности.

Центар за ненасилна акција, Сараево и Белград, БиХ и СЦГ

ЦНА е невладина и непрофитна организација чии основни цели се изградба на мирот, развој на граѓанското друштво, регионална соработка и поврзување и промоција на ненасилството.

Наша основна активност е организирање тренинзи (семинари) од ненасилна разработка на конфликти и поддршка на групи и поединци кои сакаат да работат на изградба на мирот, како и организирање активности на полето на соочување со минатото. Преку тренинзите од ненасилна разработка на конфликти имаме за цел развој на политичката свест на учесниците и ширење на вештините на ненасилно разрешување на конфликтите.

Канцеларијата во Сараево постои од 1997 година, додека канцеларијата во Белград е отворена во летото 2001 година.

Повеќе информации за нас на нашата веб-страница: www.nenasilje.org.